- 120 -
1327 (6.-13. stycznia) Wrocław.
Henryk VI. Dobry, książę Śląska, pan na Wrocławiu, określa kary pozbawienia praw dziedziczenia dla kobiet, dziewic lub wdów, porwanych w celu matrymonialnym etc.
— In gotis namen amen. Alle dinc, di in der czyt geshen, di müsin in der czyt vorgen; dorvmme ist des not, das man vorgencliche dinc bestetege mit der herin geczuknisse vnde mit brifin. Douon ist das; das wir Heinrich, von gnadin gotis furste zu Slesien vnde here czu Wretslaw, tun kunt allin den, di disin keginwertegin bryf gesen adir gehorin, das wir an habin gesen das getruwe stete langis dinist, das vnsir getruwin burger vnsir stat czu Wretslaw vns vnde vnsim eldirn getan habin, vnde habin si di selbin vnsir burger vnde alle ire nochkumelinge mit gutim willin vnde mit bedechtnisse von rate vnsir getruwin manne begnadit vnde begabit in sundirlichin gnadin an den sachin, di her noch geshribin sten: Wirt ein mayt adir ein wyb mit gewalt inpfurit, vnde de mayt adir das wib dornach bi der he blibit mit dem, der si inpfurit hat, di shal darbin vnde inperin allis irs gutis vnde erbis, das si hat, adir si anirsterbin mac, di wile der selbe intfurer lebit. Des selbin iris gutis vnde aneuallis shal sich di stat vndirwindin, der vrowin vnde irin kindin adir irin nestin erbin czu behaldine bis noch des inpfurers tode. Nemo abir ein mayt adir ein wyb an' ire nestin vnde wiczegestin frunde rat einin man von iris selbis willin, di shal inperin alle irs gutis vnde aneuallis, di wile das si lebit. Gewinnit abir si kindir, di sullin is habin noch irre mutir tode; di wile abir di frowe lebit, so shullin sich di ratman czu Wretslaw von der stat wegin iris gutis vnde aneuallis vndirwindin, czu behaldene der vrowin kindin adir irin nestin erbin.
2. Dornoch gebe wir euch den vorgenantin vnsin getruwin burgern vnde der stat czu Wretslaw von genadin vnde sundirlichir gunst, ab ein vngeshicht geshyt, des got nicht welle, das ein man den andirn czu tode sluge, vnde ab der selbe morder sich vmme den totslac berichte kegin den sachwaldin, das her doch noch der berichtunge obir czwey iar czu der stat noch czu des landis hulde widir muge komin.
Des habe wir czu eime vrkunde vnsir ingesigil gehangin an disin brif, alse man czelit noch gotis geburthe driczen hundirt iar in dem sebin vnde czwenczegistim iare bin den acht tagin des obirstin tagis vnsirs herin in der keginwertekeit vnsir manne hern Niclos von Bancz, hern Jan von Borsnicz, hern Hogir von Preticz, Albrechte von Pak, Hermanne von Borsnicz, Giskin von der Wide, hern Ottin von Donin, vnsirm obirstin shriber, dem disir brif beuolin was.